Woostha Louis, yon vrè fo polisye

Pòtoprens,Ayiti, 15 septanm 2024 -Tinouvel.com 

Ayiti-Sekirite

Woostha Louis, yon vrè fo polisye

Yon Ayisyèn 48tan, Woostha Louis, alyas "Tata" ki abitye fè tèt li pase kòm polisye nan men lapolis depi lendi 9 septanm 2024.Se Inite Depatman  Metyen Lòd (UDMO) Wès 2 ak Sèvis Polis Jidisyè Depatmantal (SDPJ) ki te mete fen ak eskrokri  manman twa timoun la tap fè  depi 27 ane .Polis Nasyonal Dayiti (PNH)te mete l nan detansyon prevantif. Lapolis  louvri yon ankèt.

Nan moman arestasyon li a, li te an inifòm ki te genyen grad Enspektris Divizyonè sou zèpòl li. Li te genyen  yon zam sèvis nan senti li ak yon pè menòt.

Premye envestigasyon yo montre, Woostha Louis kòmanse magouy li an depi 1997 ,sèlman 2 zan apre kreyasyon  Polis Nasyonal Dayiti (PNH)an 1995.Lè sa a ,Woostha Louis  te ka genyen 21 lane.

Pandan entèwogasyon  Louis admèt li se yon magouyèz  ki itilize  eskrokri sa a pou l te jwenn lajan pou l ta  swadizan okipe  fanmi li.Louis admèt li te  pran avantaj sou   anpil viktim inosan nan ofri sèvis kont peman lajan pou fasilite tranzaksyon ki gen rapò ak asirans machin, paspò, plak anrejistreman, dokiman tankou lisans pou kondwi ak lòt sèvis ki pa detaye nan laprès.Li avwe li te  twonpe vijilans anpil wo diyitè PNH yo.Woostha Louis  menn rive tronpe pitit li yo  ki te toujou kwè manman yo se polisyè.

Lapolis konfiske plizyè materyèl tankou zam,inifòm ak menòt  li te konn itilize kòm fo polisye li avwe li itiize zam sa a yon sèl fwa pandan fèt fen ane 2023 a.

Fanm  ki fè tèt li pase  kòm  polisye  te aktif anpil sou teritwa nasyonal la pandan 27 tan sa yo.Dapre PNH, Woostha Louis te konn frekante komisarya Bon Repos, Croix-des-Bouquets, Delmas ak Gonayiv kote li te itilize espas ki rezève pou anplwaye yo kap  trete dosye sansib . Li te  menn patisipe nan sewemoni gradyasyon yon lekòl nan Mibalè  ak inifòm PNH ak grad Enspektris Divizyonè .

Woostha Louis, alyas "Tata" rete Delmas e li gen 4 kont Facebook e li pibliye yon foto an 2017 kote li  chita nan yon biwo ki ta sanble yon komisayara polis ak yon radio kominikasyon devan li e li menn gen yon  kont facebook foto pwofil se yon zam ak minisyon.

Nou pa konnen ki akizasyon lapolis ap mete sou fanm 45lane a.Eske yo ap akize l pou vòl, abi feblès ,izipasyon tit e latriye men arestasyon sa a soulve anpil kesyon sou feblès sistèm siveyans ak kontwòl anndan enstitisyon lapolis la. Estrateji vre fo polisye fèt nan plizye lòt peyi nan mond lan tankou suis, lafrans e latriye ,men sa ki deranje  nan ka Ayiti a se kòman Woostha Louis izipe fonksyon polisye  epi aji ak sikile anndan PNH pandan 27 tan san li pa janm enkyete.

Nou pa konnen ki estrateji li te konn itilize pou jwenn viktim yo .Anpil kesyon ap poze si se pou kont li te òganize gwo magouy sa a ?Eske li benifisye konplisite anndan  enstitisyon an? Men  ankèt la dwe p chaje e jwenn tout konplis li yo e dekouvri si li ta pran plizyè dizèn de milye de goud nan men viktim li yo.

Ronald Leon
tinouvel509@gmail.com
@ti_nouvel