Ayiti : Vyolans sou Waf Jeremie ,Tirivyè latibonit ak Pòtoprens , yon  echèk sekirite pou CPT a ak Alix Didier Fils-Aimé

Pòtoprens, Ayiti 13 desanm 2024 -Tinouvel.com

Opinyon

Ayiti: Vyolans sou Waf Jeremie ,Tirivyè latibonit ak Pòtoprens , yon  echèk sekirite pou CPT a ak Alix Didier Fils-Aimé

Premye Masak  te fèt  ant jedi 5 desanm ak samdi 7 desanm lan sou Waf Jeremi an ,kote  Nasyonzini te konte 184 moun mouri e  ansyen majistra Bouchard  te anonse nan jounal an liy   Ayibopost  kantite moun ki mouri yo pase a 300 ant Madi 10  ak Mèkredi11 desanm  lan .

Nan jou sa yo , chèf gang Mikanò Altes ou Monel Felix, alyas "Wa Mikanò te  bay   sòlda  li yo lòd  pou touye tout tigranmoun li te  akize lougarou e annapre  li  te fè touye jen ou byen adolesan ak moun li akize yo ta devwale enfòmasyon ki gen rapò ak masak la bay laprès. 

Dezyèm Masak la  te fèt nan sware madi 10 desanm pou rive mèkredi 11 desanm nan, toupre lekòl segondè Henry Christophe, yon kote senbolik  nan ti rivyè latibonit . Temwen yo afime  asayan nan gang "Gran Grif nan Savien te aji ak yon vyolans san parèy  e egzekite plis pase kenz moun, pami yo plizyè  timoun , epi boule plizyè kay ak machin.

Bilan trajik sa yo toujou ap kontiye  malgre diskou fèm pòtpawòl Misyon Kenya a, Jack Mbaka, sou Radiio Tele Metropole: "operasyon desizif yo kòmanse epi li di li gen konfyans  pou afwonte gang yo",

Pòtoprens leve ak dòmi  anba tansyon  

Kout  zam gwo kalib kap tire   nan Nazon, Delmas, Poupelard ak Lalue nan debi wikenn mete plis enkyetid lakay moun yo. Kowalisyon "Viv Ansanm" kap  atake plizyè zòn, boule Lekòl Horace Éthéard nan Ravine Pintade mete aksan sou enkapasite flagran Gouvènman  ki sou pouvwa a pou asire sekirite peyi a. 

Ki otorite  pou  ki defi ?

Depi enstalasyon Alix Didier Fils-Aimé kòm Premye Minis Ayiti 10 novanm 2024, Gouvènman lian  te pwomèt pou retabli sekirite epi mete fen ak vyolans gang ame Viv ansanm yo  tap frape Ayiti.Sepandan, atak sa a revele yon reyalite trè diferan: enkapasite lapolis , lame a ak Misyon Kenya a  pou antisipe ak reponn efikasman a menas k ap grandi. 

Lefèt gwoup sa yo ap  atake yon zòn tankou Delmas, Nazon nan gwo lajounen e fè nou ap poze kesyon seryezman sou  mezi prevansyon ak entèlijans  otorite yo mete an plas pou kontre bandi yo .Ki sa  lajan entèlijans nan Primati,nan Prezidans , nan afè etranjè ak lapolis ap regle? Ki defi sekirite otorite yo paka leve la?

Popilasyon sivil la toujou sib bandi yo 

Nan latibonit se gwoup gang Savyen ki enstore yon klima laterè nan plizyè komin nan depatman sa a.Atak yo  montre tou inaksyon otorite yo devan detrès popilasyon sivil yo. Pandan plizyè ane, popilasyon nan rejyon  metwopolitèn lan ap  viv anba menas konstan nan men gwoup ame Viv ansanm yo.Sepandan, olye otorite yo ranfòse pwoteksyon yo, popilasyon an  kontinye soufri anba atak sanglan yo, souvan san okenn repons reyèl nan men Leta. Pwomès CPT ak Gouvènman  an pou elimine menas teworis la parèt de pli zan pli tankou eslogan vid. Li konsantre sou konsolide pouvwa  yo  e bliye manda prensipal yo: garanti sekirite Ayisyen yo.

Yon lòt  estrateji pou Ayiti

Fas ak echèk sekirite , CPT ak Gouvènman   dwe fè fas ak  verite anmè: apwòch aktyèl li yo pa apwopriye. Plan sekirite a , si genyen , pa bon e travay Misyon entènasyonal Kenya a pa efikas. Pandan se tan, moun kontinye ap mouri, fanmi kontinye ap kite kay yo pou yo ale nan kan e sitwayen yo ap pedi konfyans otorite yo.

Otorite dwe  redefini priyorite yo nan bay bandi repons apwopwiye pou pwoteje popilasyon yo.Gouvènman   dwe respekte pwomès sekirite li yo. Li  dwe chache konnen mèt  bandi yo  sou sèn entènasyonal  la pou sa pi byen  trake e mennen yo devan lajistis.Alix Didier Fils-Aimé  dwe mete kanpe konsèy nasyonal sekirite kap bali enstriman legal  pou yo mache pran e mete  chèf gang yo nan prizon ou voye  nan peyi san chapo .

PM lan dwe bay  lapolis  gwo resous pou batay kont ensekirite. Li dwe ogamante  bidjè lapolis pou entèlijans lan .Si se pasa CPT ak Gouvènman pap gen okenn  lejitimite e lap pèdi tout kredibilte  nan je pèp ayisyen.
  
Pascal Andre Pierre