Ki moun Tyler Robinson,nonm yo sispèk ki ta tire Charlie Kirk ?

Utah, Etazini,12 septanm 2025  -Tinouvel.com 

Asasina Charlie Kirk 

Ki moun Tyler Robinson,nonm yo sispèk ki ta tire Charlie Kirk ?

Moun yo akize ki touye aktivis konsèvatè Charlie Kirk la rele Tyler Robinson,li gen 22 an.Otorite lokal yo fè konnen Tyler Robinson,  se prensipal sispèk nan asasina sa a.Robinson te fèt nan Utah an 2003, dapre NBC News ki site senk sous otorite lapolis  .

Sa rive apre FBI a te pibliye foto yon moun yo te sispek pandan yo te lage koukouwouj dèyè asasen Kirk la. Foto yo te montre yon nonm blan ak linèt solèy, yon kepi bezbòl ak yon mayo nwa manch long ki te  gen yon drapo Etazini ak yon èg sou li.Tyler Robinson, sispèk la, te rive sou kanpis Inivèsite Utah Valley mèkredi a 8:29 a.m. nan yon Dodge Challenger gri,  jan yo te  wè li nan videyo siveyans yo, dapre Cox .

Prezidan Donald Trump te anonse  yo te kenbe sispèk ki ta touye fondatè Turning Point USA a. 

Prezidan an te di tou  se papa sispèk la ki te livre  li bay lapolis apre li te fin wè imaj yo.Manm fanmi Tyler  te di li te “plen rayisman” nan kè l epi li te konfese bay papa l se li menm ki te asasen an.

Fanmi Robinson te di anketè yo  li te vin "plis politize nan dènye ane yo", epi sispèk la te mansyone Kirk t ap vizite Inivèsite Utah Valley. Robinson  ta panse enfliyansè konsèvatè  ap "simen rayisman".

Dapre sous lapolis yo, yo te arete l jedi swa nan St. George, Utah, toupre Zion National Park, anviwon 250 miles nan sidwès kanpis kote yo te touye Charlie Kirk la, yon ofisyèl nan  lapolis te di New York Times .

Envestigatè yo te jwenn anpil mesaj ki montre dezakò sispèk a ak aktivis ekstrèm dwat la ki  te  grave  sou bal li te itilize yo epi  fizi a ak linèt li te itilize a te yon zam"inik," dapre Gouvènè Utah Spencer Cox  nan yon konferans pou laprès li te bay vandredi maten an.

Ofisyèl yo te jwenn yon fizi ak boulon vlope nan yon sèvyèt nwa ayè nan yon rakbwa tou pre Inivèsite Utah Valley. Cox te di se te yon fizi ak boulon Mauser modèl 98. Li te gen yon linèt monte sou li.

Sou douy yo te jwenn andedan fizi a, Cox te di yo jwenn enskripsyon  sa yo: "nòt, bòs, OWO, kisa sa ye?"

Twa douy ki pa t tire te gen enskripsyon sou li  tou, Cox te deklare.

Youn te ekri, "Hey fachis! Pran sa a!" ak yon flèch anlè, yon flèch adwat ak twa flèch anba.

Dezyèm lan te di, "Oh bella ciao, bella ciao, bella ciao ciao."

Twazyèm lan, "Si ou li sa a, ou se masisi LMAO."

13 jiyè 2021 se ta  dènye dat  Robinson te enskri nan yon rejis elektoral  , epi pa gen okenn pati politik ki deklare nan rejis piblik yo.

Gouvènè Utah , Spencer Cox, te mande pou pwokirè yo pouswiv li pou pèn lanmò a, ki legal nan eta a.

Ronald Leon
tinouvel.com@gmail.com
@ti_nouvel
www.haitianmediaunited.com